بقلم: ناصر كلجي

شعور بيجيك لما تشوفه بقرعه كاس العالم مع منتخبات مثل الأرجنتين .
لما تشوفه على كتف طبيب بمستشفى في غزه .
لما تشوفه على اردنيه عسكريه محجبه بتساعد مسنه بالحج المسيحي عند المغطس، و تعرف انها دليل على قديش احنا بشر اكثر من كل أشباه البشر على الضفه الثانيه من النهر و الغرب تبعهم كله .
بيجيك لما تشوف سيدة سوريه كبيره بالعمر هربانه من الحرب في بلدها و تعبط عسكري اردني قد أحفادها على الحدود و تقوله " الحمدالله، الحمدالله ، وصلنا يا امي ، احمونا "
مرات بيجيك في مدينه غريبه في كوريا الجنوبية بعد نتيجه ممتازه و تلاقيه برفرف و الشباب بتدبك ، بيجي هذا الشعور لما يخلص الاحتفال و يصير الكل يطمن على بعض ( عندك توصيله ؟ امانه تتعشى معنا ).
لما موظف الجوازات بمسقط يسألك " جاي مع النشامى؟"
لما تسال والدتك شو بدك تعملي إذا أجونا ولاد العايبه من الغرب و تقولك " و لا اشي ، بلدنا ، يا منحميها يا منموت و احنا منحاول "
الحياه مش كلها ورد و فراشات طبعا .
بتنقهر لما تشوف دراسه عن البطاله بالعالم و العلم موجود جنب رقم سيء ، بتنقهر لما تشوف تقارير عن الفقر او التعليم او الفساد و المركز بحزن ، بصيبك غصه لما ناس تستخدمه بطريقه غير مناسبه.
بتنقهر لانها بلدك وًانت عارف انه لازم تكون كثير افضل بكثير من المجالات .
لو ما بتحبها ما بتفرق معك .
العلم هو احنا ، بكل شغله رهيبه فينا و بكل شغله سلبيه فينا ، علم لبلد بكل تناقضاته و تاريخه و ناسه، من أشياء مضحكه مثل " اسبوعين و بنشف و بموت " و " ركنيه من مكان خطير " و مفرحه مثل " فيلم اردني يتألق في مهرجان كان "و " ميداليات بالجمله لابطال في الملاكمه من مخيم البقعه " لا أشياء مضحكه و مبكيه بنفس الوقت مثل " عنق الزجاجه" و " اجمل الايام تلك التي لم تاتي بعد " لحكومه قاعده تناقش قانون ضمان و كانه الذكاء الاصطناعي رح يخلي في وظايف كمان خمس سنين .
كل عام و هذا البلد و ناسه و تناقضاته العجيبه الغريبه المضحكه المحزنه ، بالف خير ، محبه ، و سلامه.