المجالي يكتب: انتخابات الغرف التجارية… بدلنا الديكور ونسينا نغير الأثاث

التاج الإخباري -

بقلم: الدكتور نضال المجالي.

الله يعين التاجر! هالأيام صار أغلى من الذهب، الكل بده صوته، والكل بحبه، والكل فجأة صار همه مصلحة السوق والتاجر والاقتصاد! يا سلام، شو حلوة الانتخابات، بتخلّي اللي ما بسأل عنك طول السنة يتذكرك قبل الصندوق بشهر زمان!

واضح إنها مش انتخابات بقدر ما هي بطولة مفتوحة بحرب الكراسي. واحد بده يضل صوته مسموع، والثاني مبرطع بشيخته، والثالث شايف حاله ماركة تجارية عالمية ما إلها وكيل غيره، والرابع مستغرب كيف الناس بتفكر إنه ممكن يكون في حياة تجارية بدونه!

والأجمل إنه نفس الوجوه، نفس الحركات، نفس الابتسامات، ونفس الوعود، بس كل موسم بغيروا لون الغلاف! يا جماعة الخير، حتى علبة السردين إلها تاريخ صلاحية، وحتى الماركات التجارية إلها زمن وبتتقادم، إلا بعض الكراسي شكلها داخلة بعقد زواج أبدي مع أصحابها!

التاجر المسكين مفكر إنه صوته رح يغيّر المشهد، وإنه رايح يختار ناس جدد، بس يمكن المفاجأة إنه رايح يشارك بإعادة توزيع الأدوار بين نفس الممثلين!

واحد ملزق بالكرسي، والثاني بده يرجعله مكررا لحضنه، والثالث بده يورجي الناس إنه لسه موجود… أما التاجر فمطلوب منه يصفق ويختار ويدفع!

وبين هالمهرجان، مين الضايع؟ التاجر اللي صدّق إن صوته بصنع فرق، والمستهلك النهائي اللي رح يدفع الفاتورة، وهو آخر واحد بعرف شو صار بالانتخابات!

يا سادة، الغرف التجارية مش استراحة محاربين، ولا الكراسي ملكية خاصة، ولا الخبرة معناها تضل قاعد لحد ما الكرسي يحفظ شكلك!

بكفي تدوير، بكفي تغليف جديد لمنتج قديم، وبكفي ختيارية عالكراسي!

السوق بده نفس جديد، مش عملية تجميل لنفس الوجوه.

والله يعين التاجر… داخل ينتخب مجلس، ويمكن طالع مجدد اشتراك لنفس المسرحية!




مقالات ذات صلة

زر الذهاب إلى الأعلى