التاج الإخباري -

بقلم : إيمان عكور

صرنا نصحى على رقم..ننام على رقم..نتنفس على رقم.
وكأن حياتنا تحولت لشاشة بورصة.
الذهب طلع ؟ القلق طلع معه.
الذهب نزل؟ الخوف نزل في صدورنا. والمفارقة المؤلمة؟
ولا حدا مرتاح... اللي عنده ذهب خايف يخسره، واللي ما عنده ذهب موجوع إنه ما اشتراه، يعني المعدن ثابت…بس الإنسان هو اللي يهتز.
السياسة تتخبط، الحروب تشتعل، الاقتصاد يرتجف…
وإحنا الإنسان البسيط، كل حلمه كان يعيش بهدوء، لكن حتى الهدوء صار مربوط بنشرة أخبار.
اكيد كل انسان
من حقه يأمّن نفسه للزمن.
يدّخر، يخطط، يحمي أولاده، يفكر بالمستقبل…هذا وعي، مش طمع.
لكن المشكلة تبدأ لما يتحول "التأمين" إلى "هوس"، ولما يصير الأمان رقم يسرق راحة قلوبنا كل يوم.
الذهب حجر بارد، لا بطبطب على قلب، ولا بخفف خوف.
الأمان الحقيقي ما كان يومًا معدن…
الأمان حالة داخلية، نركض خلف اللمعان لأنه خايفين من الغد،
فنمسك بالذهب كأننا نمسك بالطمأنينة نفسها، بس الحقيقة؟
اللي ما عنده سلام داخلي لو ملك ذهب الأرض بيظل يرتجف.
أخطر شي مش انهيار الأسعار…
أخطر شي لما ينهار هدوءك من الداخل وإنت مفكر حالك "بتأمّن مستقبلك".
السؤال هالوقت مش: كم سعر الذهب؟
السؤال: كم صار سعر راحتك النفسية؟
وقديش من عمرك عم تدفع ثمن خوف ما له نهاية؟
لأنه الغنى الحقيقي مش اللي في الخزنة…
الغنى إنك تعرف تقول:
"أنا بأمّن حياتي… لكن مش على حساب قلبي."